Кыргыз Республикасынын Улуттук тарых музейи — Борбордук Азиядагы эң ири музейлердин бири. Анын фондунда байыркы доорлордон бүгүнкү күнгө чейинки кыргыз элинин тарыхын, маданиятын жана жаратылышын чагылдырган он миңдеген кайталангыс экспонаттар сакталат. Музей 1925-жылы 9-декабрда Абдыкадыр Орозбеков башчылык кылган Кыргыз автономиялык облусунун Аткаруу комитетинин Президиумунун чечими менен алгач Борбордук музей катары негизделген. 1927-жылы 5-мартта ал М. В. Фрунзенин үйүндө алгачкы коноктарын кабыл алган. Музейдин башатында анын биринчи директору, көрүнүктүү окумуштуу-этнограф С. М. Абрамзон турган — анын этнографиялык табылгалары алгачкы коллекциянын негизин түзгөн.
