Бостеридеги «Дордой-Номад» маданий-этнографиялык комплекси төрт күнгө фестивалдык шаарчага айланат. Күндүзү Амфитеатр, Пирс жана Кол өнөрчүлөр аллеясы иштейт: этно-мода жана фотосессия, «Кыл_Арт.KG» кыл-кыякчылар ансамбли, «УстатШакирт» фольклордук-этнографиялык ансамбли, «АУРА» фолк-жаз тобу, «АРАЛАШ» импровизациялык театры, Италиялык «Dell Arte» театры. Кечкисин Чоң сахнада «ЭТНО-БИЙ», «ЭТНО-МОДА» жана «КӨЧМӨН ЖЫЛДЫЗДАРЫ» сынактык программалары өтөт.
Кол өнөрчүлөр аллеясында — этно-көргөзмө жана кыргыз, чет өлкөлүк чеберлердин эмгектеринин жарманкеси, зергерчилик, кийиз, терме, металлга көркөм чегүү, керамика, сайма, сөөккө оюу түшүрүү жана суу бетине сүрөт тартуу боюнча чебер-класстар. ART LABда — «Улуу тоолор баяны» көчмө көргөзмөсү жана пленэрлер.
2-сентябрь — салтанаттуу ачылыш, 3 жана 4-сентябрь — сынактык күндөр, 5-сентябрь — жабылыш, сыйлоо аземи жана фейерверк.
Билет бир күнгө жарактуу жана кечки программаны кошо алганда, комплекстин бүт аймагына жеткиликтүү. Билеттер nebs.gov.kg сайтында гана сатылат; сатып алууда аты-жөнү көрсөтүлөт.
