«Көчмөндөр ааламы» этно-маданий шаарчасы (Кырчын жайлоосу)

Кырчын жайлоосу — негизги этно-аянтча Кырчын жайлоосунда Дүйнөлүк көчмөндөр оюндарынын негизги этно-аянтчасы жайгашып, улуттук маданиятты, каада-салттарды, кол өнөрчүлүктү, улуттук тамак-ашты жана спортту кеңири тааныткан маданий программа сунушталат. «Кут Ордо» башкы сахнасында: «ДҮЙНӨ-ӨМҮР» театралдык коюму, «Биримдик кербенинин» келиши, республикалык «Шамдагайлар» — боз үйдү ылдамдыкта тигүү жана чечүү, «Жашоо жарыш» сынак-эстафетасы, «Көчмөн кайрык» этно-ырлар, «Бий ыргак» этно-архаикалык бий, «Саркеч» салттуу кийимдер сынактары, ошондой эле кыргыз жана казак төкмө акындарынын эл аралык айтышы өткөрүлөт. «Көчмөндөр айылында» ар бир аймактын өз ордосу жайгашып, «Көчмөндөр даамы» улуттук тамак-аш, «Мыкты кыргыз боз үйү», «Уз-уста» кол өнөрчүлүк сынактары жана каада-салттардын театралдаштырылган көрсөтүүлөрү уюштурулат. «Ырыс Ордо» аянтында коомдук бирикмелердин ордолору иштейт. Алардын катарында 20 түрдүү элечекти тааныткан жана ала кийиз жасоо боюнча көрсөтүүлөрдү сунуштаган «Кийиз Дүйнө», «Мекендештер», Кыргызстан элдеринин ассамблеясынын «Достук-Ордо», санжыра жана салбуурун өнөрүн тааныткан «Жер-Эне», «Ала-Тоо айымдары» бар. Эл аралык «Этно-Базарда» жарманке, көчө өнөрпоздорунун чыгармачылык көрсөтүүлөрү, усталардын жана ашпозчулардын чебер-класстары, «Шамал-фест» фестивалы өтөт. Кечкисин манасчылардын өнөрү тартууланып, телескоптор аркылуу жылдыздуу асманды байкоо мүмкүнчүлүгү түзүлөт. Өзүнчө «Дүйнөлүк көчмөндөр ашканасы» аянтында беш континенттин ашпозчуларынын сынагы өткөрүлөт. Ал эми балдар үчүн интерактивдүү оюндар жана көңүл ачуучу программалар менен «Кичи көчмөн» ордосу иштейт. Этношаарчанын спорттук аянтчасында ордо, алыскы аралыкка ат марафону, бүркүт жана куш салуу, кыргыз жана түрк стилиндеги жаа атуу, таяк тартыш, аркан тартыш, сумо, стронгмен, армрестлинг жана башка көрсөтмө мелдештер уюштурулат. Кирүү акысыз.